छठी माई क महिमा

आजु कहनी सुनाएब बार बार सइयाँ जी।

छठी माई क महिमा,अपरम्पार सइयाँ जी॥

 

त्रेता में सीता मइया कइली छठ बरतिया

रामराज पसरल, परजा सुखी दिन रतिया

जुग जुग के मिलल माई क दुलार सइयाँ जी॥

छठी माई क महिमा——

 

द्वापर में कुंती जब कइली छठ बरतिया

करण जइसन बेटा पवनी अद्भुत सुरतिया

उनुका पराकरम के खिस्सा हजार सइयाँ जी॥

छठी माई क महिमा——

 

जुआ में हरलें पांडव आपन दउलतिया

द्रोपती के छठ बरत के सुनाइल बतिया

माई किरपा से लउटल सब असरार सइयाँ जी॥

छठी माई क महिमा——

 

राजा प्रियब्रत के ऋषि पुत्रेष्टि जग करवले

नवें महीना मालिनी रानी के बेटा जनमलें

मुअल लइका देखि राजा बेजार सइयाँ जी।

छठी माई क महिमा——

 

आत्मघात के सोचलें राजा जात समसाने

राजा के सोझा हे अइली छठी माई बहाने

कहलीं पूजा के किरती अपार सइयाँ जी।

बेटा होते गूँजल जय-जयकार सइयाँ जी।

छठी माई क महिमा——

 

अजुओ ले छठी माई के लमहर किरीतिया

आईं मिली जुली सभे कइल जाव बरतिया

माई कामना पुरइहें हर बार सइयाँ जी।

छठी माई क महिमा——

 

  • जयशंकर प्रसाद द्विवेदी

Related posts

Leave a Comment