सखी सहेली खड़ा,बाड़ी कतार में,
रोवतारी माई , धके अकवार में।
नईहर छोड़ी जब, ससुरा में जाली,
फेड़ से लागे जस ,टूट गइल डाली।
बरसो के रिश्ता, तोड़ी एक बार में..
रोवतारी माई , धके अकवार में।
सुसुकी-सुसुकी माई,लोर बहावेली,
बेरी,बेरी बेटी जरी,घूमी के आवेली।
भरे ना जियरा ,मिले से एक बार में..
रोवतारी माई , धके अकवार में।
हो तारू बेटी आज, हमसे पराया,
जा तारू जहाँ तू, करिह हो छाया।
खुशीया भरल रहे, घर संसार में..
रोवतारी माई , धके अकवार में।
- दीपक तिवारी
श्रीकरपुर,सिवान
