‘भोजपुरी साहित्य में महिला रचनाकारन के भूमिका’ के मिलल अकादमिक स्वीकृति

भोजपुरी के सुप्रसिद्ध साहित्यकार आ ‘भोजपुरी साहित्य सरिता’ के संपादक जयशंकर प्रसाद द्विवेदी के सह-संपादन में प्रकाशित कृति ‘भोजपुरी साहित्य में महिला रचनाकारन के भूमिका’ (संपादक – डॉ. सुमन सिंह, केशव मोहन पाण्डेय आ जयशंकर प्रसाद द्विवेदी) के बिहार के सभ विश्वविद्यालयन के स्नातकोत्तर (M.A. भोजपुरी – MABHO-DS31C) पाठ्यक्रम में नया सत्र 2026-27 से शामिल कइल गइल बा, ई खबर हमरा खातिर अत्यंत हर्ष आ गौरव के विषय बा।

ई उपलब्धि ‘भोजपुरी साहित्य सरिता’ परिवार खातिर बहुत उत्साहवर्धक बा। ई हमनी सभ के साझा मेहनत, समर्पण आ भोजपुरी साहित्य के प्रति निष्ठा के अकादमिक स्वीकृति ह।

हम बिहार के सभ विश्वविद्यालयन के कुलपति, भोजपुरी विभाग के विद्वान अध्यापकगण आ पाठ्यक्रम समिति के हृदय से आभार व्यक्त करत बानी, जे ‘भोजपुरी साहित्य में महिला रचनाकारन के भूमिका’ जइसन महत्वपूर्ण कृति के अकादमिक मान्यता देके भोजपुरी साहित्य के समृद्धि में एगो महत्वपूर्ण कदम उठवले बा।

हमरा पूरा विश्वास बा कि एह कृति में संकलित 16 गो चयनित आलेख भोजपुरी के महिला रचनाकारन के सृजन, संघर्ष, संवेदना आ साहित्यिक योगदान से नई पीढ़ी के परिचित करइहें आ ओह लोग के भोजपुरी भाषा-साहित्य के जड़ से गहिराई से जोड़े में महत्वपूर्ण भूमिका निभइहें।

ई स्वीकृति खाली एगो कृति के पाठ्यक्रम में शामिल होखे के उपलब्धि ना ह, बलुक भोजपुरी साहित्य में महिला रचनाकारन के महत्वपूर्ण योगदान के मिलल सम्मान आ भोजपुरी भाषा के अकादमिक प्रतिष्ठा के मजबूत करे वाला एगो ऐतिहासिक कदम ह।

Related posts

Leave a Comment